د پوهنې وزارت د دعوت او ارشاد ریاست پلاوي د لغمان او ننګرهار ولایتونو له پوهنې مسئولینو سره وکتل
د مولوي محمد نعیم عمیر په مشرۍ د پوهنې وزارت د دعوت او ارشاد ریاست پلاوی د یو لړ رسمي چارو ترسره کولو په موخه لغمان او ننګرهار ولایتونو ته ولاړ او هلته یې له پوهنې رئیسانو، د مرکز او ولسوالیو پوهنې آمرینو او د ښوونیزو بنسټونو له مسئولینو سره وکتل.
د دعوت او ارشاد ریاست پلاوي د خپل سفر اساسي موخې بیان کړې او دیادو ولایتونو پوهنې مسئولینو ته یې وویل، چې ورځنۍ دندې یوازې د الله تعالی د رضا لپاره ترسره، خپل صورت او سیرت د رسول الله «صلی الله علیه وسلم» په سنتو برابر او ټول اعمال د شریعت په چوکاټ کې تنظیم او پلې کړي.
همدارنګه د یاد پلاوي د پوهنې ریاستونو چارواکو ته په ادارو کې د «اساسات اسلام » کتاب د تدریس توصیه هم وکړه.
له بلې خوا د لغمان او ننګرهار پوهنې مسئولينو يادو ولايتونو ته د ورغلي پلاوي له سفر څخه د هرکلي ترڅنګ، د دعوت او ارشاد ریاست د ټولو پلانونو د پلي کېدو ډاډ څرګند کړ.
