د پوهنې وزارت د دعوت او ارشاد ریاست د کړنو «اوونیز راپور»
له شنبې ۱۴۴۶/۱/٢١هجري قمري تر پنجشنبې ۱۴۴۶/۱/٢٦هجري قمري (د اسد میاشتې له٦مې تر ١١مې نېټې۱۴۰۳/ لمریز).
د پوهنې وزارت د دعوت او ارشاد ریاست مسئولینو تېره اوونۍ د کابل ښار اوومي ښوونیزې ناحیې اړوند د قاعلي شمس،محسن فرمولي، افغان مطهر، بي بي فاطمه(رض) شیخ السلیم، ژوندون، باران له رسمي او خصوصي ښوونځيو څخه د لیدنو په ترڅ کې، د یادو ښوونيزو بنسټونو مسئولینو او زده کوونکو ته اړینې سپارښتنې وکړې.
ددغو لیدنو پر مهال د دعوت او ارشاد ریاست مسئولینو د یادو ښوونیزو بنسټونو آمرینو ته «د اساسات الاسلام کتاب» د تدریس لړۍ پر تطبیق ټینګار وکړ او د همدغو ښوونځیو مسئولینو او زده کوونکو ته ديني لارښوونې وکړې، له هغوی يې وغوښتل، تر څو خپل صورت او سیرت د رسول الله «صلی الله علیه وسلم» په سنتو برابر او همدارنګه د دیني درسونو په حلقو کې په جدي ډول برخه واخلي.
په ورته مهال، د پوهنې وزارت د دعوت او ارشاد ریاست ته له کابل ښار او د ولایتونو له پوهنې ریاستونو څخه لاس ته راغلي راپورونه ښیي چې:
په تېره اوونۍ کې د پوهنې وزارت د عوت او ارشاد ریاست د مسئولینو له لوري د یاد وزارت د مرکزي هستې اړوندو کارکوونکو ته د دیني درسونو لړۍ په نورمال ډول روانه وه.
همدارنګه د دعوت او ارشاد ریاست مبلغینو تېره اوونۍ د ١٥،١٢،١١،١٠،٩،٨ ښوونیزو ناحیو له مسؤلینو سره په کتنه کې، د پوهنې منسوبینو لپاره د «اساسات اسلام» کتاب د ورځنیو درسونو پر تطبیق ټینګار وکړ.
دغه راز په تېره اوونۍ کې هم د پوهنې وزارت د دعوت او ارشاد ریاست په لارښوونه، له ټاکل شوي مهالوېش سره سم هره ورځ د مرکز او ولایتونو په ښوونیزو بنسټونو کې دیني درسونو دوام درلود او د یاد ریاست د مبلغینو له لوري د هغوی درسي بهیر هم له نبږدې څارل شوی دی.
