د پوهنې وزارت د دعوت او ارشاد ریاست د تېرې اوونۍ «اوونیز راپور»
د ۱۴۴۵هجري قمري کال، له شنبې تر پنجشنبې ( د رمضان المبارک میاشتې له ۲۰ مې تر ۲۵ مې )
د پوهنې وزارت د دعوت او ارشاد ریاست ته له کابل ښار او د ولایتونو له پوهنې ریاستونو څخه لاس ته راغلي راپورونه ښیي چې:
په تېره اوونۍ کې د پوهنې وزارت د عوت او ارشاد ریاست د مسئولینو له لوري د یاد وزارت د مرکزي هستې اړوند کارکوونکو ته د دیني درسونو لړۍ دوام درلود.
همدارنګه په تېره اوونۍ کې هم د پوهنې وزارت د دعوت او ارشاد ریاست په لارښوونه، له ټاکل شوي مهالوېش سره سم هره ورځ د مرکز او ولایتونو په ښوونیزو بنسټونو کې دیني درسونو دوام درلود او د یاد ریاست د مبلغینو له لوري د هغوی درسي بهیر هم له نبږدې څارل شوی دی.
دغه راز په تېره اوونۍ کې په مرکز او ولايتونو کې د پوهنې وزارت د دعوت او ارشاد رياست مسئولينو له استادانو، زده کوونکو او منسوبینو سره له نیږدې وکتل.
د دعوت او ارشاد رياست مسئولينو او مبلغینو کارکوونکو او زده کوونکو ته ديني لارښوونې وکړې او له هغوی يې وغوښتل، تر څو خپل صورت او سیرت د رسول الله «صلی الله علیه وسلم» په سنتو برابر او همدارنګه د دیني درسونو په حلقو کې په جدي ډول برخه واخلي.
