د پوهنې وزارت د استخدام رئیس هرات ولایت ته رسمي سفر وکړ
د پوهنې وزارت د استخدام رئیس مولوي محمد صادق «صدیقي» چې د هرات ولایت د ښوونځیو د ښوونیز او روزنیز وضعیت د تحلیل په موخه یاد ولایت ته تللی، هلته یې د پوهنې له مسئولینو، آمرینو، د ښوونځيو له ښوونکو او علماءکرامو سره وکتل.
نوموړي په دغه ولایت کې د حاجي دین محمد، شهید احمدشاه، امام ابوحنیفه «رحمه الله»، کورت سفلی او شهید بابا ښوونځيو څخه لیدنه وکړه او د یادو بنسټونو د ښوونیز او اداري وضعیت ارزولو ترڅنګ یې، مسئولین خپلو مسئولیتونو ته متوجې کړل.
په ورته مهال پلاوي د ځایي چارواکو ستونزې او وړاندیزونه واورېدل او د حل په برخه کې یې د همکارۍ ژمنه وکړه.
له بلې خوا د يادو ښوونځيو مسئولينو د ورغلي پلاوي څخه د هرکلي په ترڅ کې ډاډ څرګند کړ، چې د پوهنې وزارت د رهبرۍ د لارښوونو په رڼا کې به خپلې دندې پرمخ وړي.
