د پوهنې وزارت خبرتیا
په دې وروستیو کې یو شمېر کړۍ او ناوړه ګټه اخیستونکي کسان خپلو شومو موخو ته د رسېدلو لپاره چې وایي:"د دوی پاڼې د پوهنې وزارت سره د همغږۍ په رڼا کې او د یاد وزارت تر څارنې لاندې د ښوونځیو درسونه آنلاین خپروي". هڅه کوي، تر څو د غیر معیاري ټولنیزو "ښوونیزو" پاڼو په جوړولو د افغان ماشومانو له برخلیک سره د لوبو کولو په موخه نشرات تر سره کړي.
د پوهنې وزارت په ښکاره اعلان کوي، چې یاد وزارت «د افغانستان د سوداګرۍ» په اصطلاح، د ښوونیزې وېبپاڼې په ګډون له کوم شخص یا ډلې سره د لېرې او آنلاین زده کړو په برخه کې هېڅ ډول هوکړه لیک نه دی لاسلیک کړی.
یاد وزارت په هېواد کې د ښوونیز بهیر د اهمیت په پام کې نیولو سره پر هغو کسانو چې په غیر قانوني کړنو بوخت دي، غږ کوي چې خپل ټول ښوونیز فعالیتونه دې له قانوني لارو او د یاد وزارت د قوانینو او مقرراتو په رعایتولو سره، د پوهنې وزارت د ښوونیز نصاب، د اسلام د سپېڅلي دین او زموږ د ملي کلتور له ارزښتونو سره سم ترسره کړي او په دې برخه کې له هر ډول غیرقانوني خپلسرو کړنو څخه په کلکه ډډه وکړي.
