د پوهنې او مالیې وزارتونو ترمنځ د عوایدو په هکله ګډه غونډه ترسره شوه
په هغه غونډه کې چې د مالیې وزارت د عوایدو د عمومي ریاست د مرستیال تر څارنې لاندې، د پوهنې په وزارت کې د خصوصي زده کړو د رئیس مولوي عبدالرحمن حمیدي په ګډون جوړه شوې وه، پکې د خصوصي زده کړو ریاست د عوایدو، په «د افغانستان بانک» کې د عوایدو لپاره د یوزر په پرانیستلو، د یو شمېر خصوصي ښوونځیو د مالیاتو د تصفیې او نورو اړوندو موضوعاتو په اړه هر اړخیز بحثونه ترسره او لازم تصمیمونه ونیول شول.
د مالیې وزارت د عوایدو عمومي ریاست مرستیال د ملي اقتصاد په پیاوړتیا کې د هېواد د سوداګریزو کړنو له بېلابېلو سکتورونو څخه د مالیاتو راټولولو اهمیت ته په اشارې سره څرګنده کړه، چې د پوهنې وزارت د خصوصي ښوونیزو بنسټونو د مالي اسنادو څخه باید په دوامداره توګه بیاکتنه او څارنه ترسره شي.
په یاده غونډه کې د مالیې وزارت د عوایدو د عمومي کمېټې پر مشرتابه سربېره د دغه وزارت یو شمېر نورو مهمو مسئولینو هم حضور درلود.
