د ولایتونو پوهنې خبرونو ته لنډه کتنه
پروان
د پروان ولایت پوهنې رئیس، د یاد ریاست له منسوبینو، دیني علماوو او د سیمه ییزو ادارو له استازو سره د یوې پراخې ناستې په ترڅ کې، د پوهنې د کیفیت او کمیت د ودې او پراختیا په موخه، د ۱۴۰۳ لمریز کال پلان او کاري پروګرامونه له هغوی سره شریک او مسئولینو ته یې لازمې سپارښتنې وکړې.
هرات
د هرات ولایت پوهنې ریاست او عاطفي بنسټ ترمنځ د همکارۍ هوکړه لیک لاسلیک شو.
د یاد هوکړه لیک له مخې به د دغه ولایت په چشت ولسوالۍ کې د ۲۰۰ تنو هغو یتیمو او بې وزله ماشومانو ته، کوم چې د اقتصادي بې وزلۍ له امله ښوونځي ته له تګ څخه بې برخې دي، د زده کړې ټولې آسانتیاوې لکه: جامې، بوټان او درسي توکي د یاد بنسټ له لوري چمتو کېږي.
هلمند
د هلمند ولایت د پوهنې ریاست مشرتابه د یو لړ مراسمو په ترڅ کې چې د دیني علماوو، د ملکي او نظامي ادارو مسئولینو او قومي مخورو په کې ګډون درلود، د یاد ولایت یو شمېر آمرین، د ښوونځیو مدیران او ممتاز زده کوونکي په ستایلیکونو وویاړل.
د پوهنې رئيس الحاج مولوي محمد عوض انصاري يادو کسانو ته د ستاينليکونو په ورکولو سره هغوی لا زيات خدمت ته وهڅول.
لغمان
د لغمان ولايت پوهنې رياست له لوري، د یاد ولايت د مرکز مهترلام ښار د بصرام لېسې د زده کوونکو ترمنځ، د قرآن کريم د حسن قرائت سیالۍ د یو لړ پرتمینو مراسمو په ترڅ کې ترسره شوې.
په یادو مراسمو کې د پوهنې رياست د مشرتابه په ګډون د سيمې يو شمېر قومي مخورو، علماوو، د ښوونځیو یو شمیر ښوونکو او زده کونکو ګډون درلود.
د مراسمو په پای کې پر ممتازو زده کوونکو ستاینلیکونه او ډالۍ هم ووېشل شوې.
