د ولایتونو پوهنې خبرونو ته لنډه کتنه
ننګرهار
د ننګرهار ولایت چپرهار ولسوالۍ اړوند د پوهنې دوستو خلکو «د قلعه سرخ»په منځني ښوونځي کې، د ۱۷ زره۸۰۰ افغانیو په ارزښت د اوبو رسولو شبکه فعاله کړه.
دایکنډي
د دايکنډي ولایت شهرستان ولسوالۍ اړوند د ورس کلي يو شمېر قومي مخورو، د یاد ولايت له پوهنې رئيس قاري عنايت الله سهار سره وکتل او په خپله سیمه کې يې د يوه ښوونځي د جوړېدو په برخه کې د همکارۍ غوښتنه وکړه، چې د پوهنې مسئولینو له لوري ورسره د همکارۍ ژمنه وشوه.
د یو بل خبر له مخې:
د دایکنډي ولایت پوهنې ریاست له لوري د یاد ولایت د ۳۴ ښوونځیو د آمرینو کلنۍ ارزونه ترسره شوه.
دا په داسې حال کې ده، چې څه موده وړاندې د دغه ولايت د پوهنې رياست د ښوونځيو ۴۰ تنه آمرین او عمومي مديران هم وارزول شول.
هلمند
د هلمند ولايت پوهنې رئيس الحاج مولوي محمد عوض انصاري د ابن حبان لېسې اداري او تدريسي چارې وارزولې او د يادې ولسوالۍ له پوهنې مسئولينو سره يې د ليدنې پر مهال، د ښوونيزو کړنو لاښه والي او د درسي کيفيت د لوړولو غوښتنه وکړه.
سرپل
د سرپل ولايت پوهنې رئيس مولوي محمد رحماني، د یاد ولايت سوزمه قلعه ولسوالۍ ته د يوه رسمي سفر پر مهال، د پوهنې له کړنو څخه د کتنې په ترڅ کې د ٣٤ نويو مدارسو د رسمي کېدو اعلان وکړ.
د یادې ولسوالۍ علماوو پوهنې رئيس ته د ښه راغلاست او د يادې ادارې د کړنو د ستاينې په ترڅ کې له هغه وغوښتل، تر څو ديني مدارسو ته خپله پاملرنه لاپسې زیاته کړي.
