د ولایتونو پوهنې خبرونو ته لنډه کتنه
نیمروز
د پوهنې وزارت د ښوونکو د مسلکي پراختیا د څانګې روزونکو نیمروز ولایت ته د رسمي سفر په ترڅ کې، د یاد ولایت له پوهنې رئیس الحاج مولوي ګل احمد حقاني سره وکتل.
همدارنګه راز هغوی د یاد ولایت د ښوونکو د وړتیا لوړولو په موخه، ۱۲ ورځنی سیمینار هم جوړ کړ.
فراه
د فراه ولایت د پوهنې رئیس په مشرۍ د خصوصي ښوونځیو له مسئولینو سره د همغږۍ غونډه جوړه شوه.
د پوهنې رئیس له ګډون والو وغوښتل، چې د تدریس کیفیت ته جدي پاملرنه وکړي او په خپلو ښوونځیو کې لابراتوارونه او کمپیوټر خونې فعالې کړي.
هرات
د هرات ولایت پوهنې رئيس مولوي رحمت الله جابر، د یاد ولايت زنده جان ولسوالۍ د خپل کاري سفر پرمهال، د دغې ولسوالۍ له پوهنې مسئولينو، ښوونکو او د ښوونځيو شورا له غړو سره وکتل او د پوهنې پر کيفيت يې ټينګار وکړ.
هلمند
د پوهنې وزارت د هلمند ولایت له پوهنې ریاست سره په همغږۍ، د یاد ولایت په مرکز کې خصوصي مدارسو او دارالحفاظونو ته شاوخوا ۳ زره ۵۰۰ ټوکه درسي کتابونه چې له اووم تر دولسمو ټولګيو پورې اړوند دي، ووېشل.
د یو بل خبر له مخې
د پوهنې وزارت د کړنلارې په بنسټ، د هلمند ولایت پوهنې ریاست د یاد ولایت د خانشین ولسوالۍ د ۲۵ بابه مدارسو او دارالحفاظونو د استادانو او زده کوونکو لپاره یو ورځنی مسلکي سیمینار جوړ کړ.
