د ولایتونو پوهنې خبرونو ته لنډه کتنه
پکتیکا
د پکتیکا ولایت پوهنې رئیس الحاج مولوي عبدالقیوم فاروقي، د یاد ولایت تروو ولسوالۍ ته د یوه رسمي سفر په ترڅ کې، د پوهنې له آمرینو، د ښوونځیو له مدیرانو، د دیني مدارسو له مهتممینو، ښوونکو او زده کوونکو سره وکتل.
په ورته وخت کې نوموړي له ښوونکو وغوښتل، تر څو د هېواد بچيانو په روزلو کې لازیاتې هلې ځلې وکړي.
ننګرهار
د ننګرهار ولایت مومندرې ولسوالۍ پوهنې آمریت له لوري، د یادې ولسوالۍ د ۲۵۰ ښوونځیو له زده کوونکو څخه د حضرت محمد( صلي الله علیه وسلم) سیرت سیالیو آزموینه واخیستل شوه.
د یادو سیالیو د ترسره کولو موخه، د رسول الله (صلي الله علیه وسلم) له سیرت، نېکو او غوره اخلاقو سره د ځوانانو آشنا کول ؤ.
په پای کې پر ۲۰ غوره ګډون کوونکو سوغاتونه هم ووېشل شول.
غزني
د غزني ولایت پوهنې رئیس الحاج مولوي میر نصیر احمد حسیني د ګیرو ولسوالۍ له ولسوال او مسئولینو سره د لیدنې سربېره، د یادې ولسوالۍ له دیني مدارسو او دارالحفاظونو هم لیدنه وکړه.
بامیان
د باميان ولايت پوهنې رياست کاري غونډه، د یاد ولايت پوهنې رئيس مولوي رحمت الله قنديلي تر څارنې لاندې، د سيمه ييزو رياستونو او د پوهنې په برخه کې د همکارو ادارو د مسئولينو په ګډون جوړه شوه.
د غونډې ګډون والو د خپلو ترسره شویو کړنو راپور له مشرتابه سره شریک او د پلانونو په پلي کولو کې یې د لا زیاتو آسانتیاوو غوښتنه وکړه.
نیمروز
د نيمروز ولايت پوهنې رئيس مولوي ګل احمد حقاني، د یاد ولايت د والي مولوي نجيب الله رفېع په مشرۍ جوړه شوې پرمختيايي غونډه کې برخه واخيسته.
نوموړي د یاد ولايت پوهنې په برخه کې د همکارو بنسټونو د کړنو، ستونزو او لاسته راوړنو په اړه د معلوماتو وړاندې کولو تر څنګ، له سيمه ييزو ادارو څخه وغوښتل، تر څو د پوهنیز نظام څخه خپل ملاتړ دوام ورکړي.
