د ولایتونو له پوهنې ډګره څو لنډ خبرونه
نیمروز
د پوهنې وزارت د ښوونې او روزنې معینیت کارپوهانو او روزونکو د یو همکار بنست په ملاتړ، د نیمروز ولایت په زرنج ښار کې د ښوونځیو د مدیرانو او سرښوونکو لپاره د "اغېزمنې زده کړې او د زده کړې د پراختیا" تر نامه لاندې۱۰ ورځنی سیمینار جوړ کړ.
بلخ
د بلخ ولایت پوهنې ریاست د یاد ولایت د مرکز او ولسوالیو پوهنې آمریتونو ته د درسي کتابونو د وېش لړۍ پیل کړې ده.
د یاد ولايت د پوهنې رئيس الحاج شيخ مولوي عبدالجليل شهیدخیل وويل: په دې پروسه کې به د بلخ ولايت د مرکز او ولسواليو ښوونځيو ته ۸۳۸ زره ۴۵۵ ټوکه درسي کتابونه ووېشل شي.
غزني
د غزني ولایت پوهنې ریاست د ښوونکو د رقابتي آزموینو په شپږم پړاو کې یو ځل بیا له مستحقو نوماندانو څخه آزموینه واخیسته.
په پام کې ده، هغه کسان چې لوړې نمرې ترلاسه کړي، د یاد ولایت د دیني مدارسو کې په ۱۳۰ خالي بستونو کې د استادانو په توګه وګمارل شي.
لغمان
د پوهنې په برخه کې د یو همکار بنست مسئولینو، د لغمان ولایت له پوهنې رئیس مولوي شاه جهان ساجد سره د لیدنې پر مهال، د سیمه ییزو ښوونیزو ټولګیو د کړنو په اړه خبرې وکړې او د یادو ټولګیو د جوړولو او څرنګوالي په اړه یې یو لړ وړاندیزونه له پوهنې رئیس سره شریک کړل، چې د پوهنې ریاست له لوري ورسره د همکارۍ ژمنه وشوه.
