د ولایتونو له پوهنې ډګره څو لنډ خبرونه
بامیان
د باميان ولايت پوهنې رئيس مولوي رحمت الله قنديلي په مشرۍ، د خصوصي انسټیټیوټونو له مسئولينو سره د همغږۍ غونډه جوړه شوه.
په یاده کتنه کې د باميان ولايت پوهنې رئيس ټينګار وکړ، چې ټول انسټیټیوټونه او خصوصي بنسټونه دې د اسلام د مبارک دین احکام او اصول په نظر کې ونيسي او له بې وزلو زده کوونکو سره دې په ښوونیز ډګر کې جدي همکاري وکړي.
پروان
د پروان ولایت پوهنې ریاست اداري غونډه، د پوهنې په برخه کې د شته ستونزو د حل په موخه جوړه شوه.
په یاده غونډه کې د نیمه بشپړو شویو پروژو د بشپړېدو، په زیانمنوشویو ښوونځیو کې د استنادي دېوالونو د جوړولو، د بې ودانیو ښوونځیو لپاره د ودانیو د جوړولو او په ۴۰ بابه ښوونځیو کې د کمپیوټري ټولګیو د پاتې کارونو د بشپړېدو په اړه لازمې خبرې او پریکړې وشوې.
نیمروز
د نيمروز ولايت پوهنې رئيس الحاج مولوي ګل احمد حقاني، د ښوونځيو د اداري او تدريسي چارو د څارنې په موخه، د یاد ولايت کنګ ولسوالۍ ته ولاړ.
دغه راز نوموړي د پوهنې د ستونزو د څېړلو پر مهال، د ښوونکو درسي پلان او د زده کوونکو ښوونیزه کچه وارزوله.
سمنګان
د سمنګان ولایت پوهنې رئیس مولوي محراب الدین اقبال، د یاد ولایت د نمبر ۲ مرکزي لېسې د ښوونکو تدریسي بهیر او د زده کوونکو د زده کړې کچه له نېږدې ولیدله.
غزني
د غزني ولایت پوهنې رئیس الحاج مولوي میر نصیر احمد حسیني په مشرۍ، د یاد ولایت د پوهنې ریاست اداري غونډه جوړه شوه.
په دغه ناسته کې د دولتي او خصوصي ښوونیزو ادارو مسئولینو د خپلو لاسته راوړنو او کړنو راپور وړاندې کړ او د راتلونکې میاشتې لپاره یې اړوند پلانونه د غونډې له ګډون والو سره شریک کړل.