د ولایتونو له پوهنې ډګره ځینو خبرونو ته لنډه کتنه
دایکنډي
د دایکندي ولایت پوهنې ریاست د ياد ولایت په مرکز او ولسوالیو کې دیني مدارسو ته د درسي کتابونو د وېش لړۍ پیل کړه.
د ياد ولايت پوهنې رئیس قاري عنايت الله سهار وويل: د دغه ولاپت د مرکز، پاتو او کجران ولسواليو په ديني مدارسو شاوخوا ١٥زره ٧٨١ ټوکه درسي کتابونه چې په پښتو ژبه دي او د لومړي، دويم او درېيم ټولګي اړوند دي، وېشل شوي دي.
زابل
د زابل ولایت پوهنې ریاست اداري غونډه د ياد ولایت د پوهنې رئیس مولوي ګل ولي متقي تر څارنې لاندې د پوهنې په برخه کې د دولتي او ملاتړو ادارو د استازو په ګډون جوړه شوه.
د غونډې ګډون والو د پوهنې په برخه کې د خپلو همکاریو د دوام ډاډ ورکړ.
د یو بل خبر له مخې:
د پوهنې وزارت له بودیجې څخه د ۴ اعشاريه ۵ ميليونه افغانیو په لګښت، د زابل ولایت په مرکز او ولسوالیو کې د ۲۲ ښوونځیو لپاره د لمریزې برېښنا سیسټم نصب او فعال شو.
د ياد ولايت د پوهنې رئيس مولوي ګل ولي متقي وايي: په ښوونځيو کې د برېښنا په فعالېدو سره د زده کوونکو ستونزې هوارې او د چارو په پلي کېدو کې لازمې آسانتياوې برابرې شوې دي.
لوګر
د لوګر ولايت په مرکز او ولسواليو کې د خصوصي مدارسو پر زده کوونکو د درسي کتابونو د وېش لړۍ پيل شوه.
د پوهنې ریاست مسئولين وايي: د ياد ولایت په مرکز او ولسوالیو کې یې شاوخوا ۴۶۸ زره او ۲۲ ټوکه درسي کتابونه چې د لومړي، دويم او درېیم ټولګي اړوند دي، خصوصي مدارسو ته وېشلي دي.
