د ولایتونو له پوهنې ډګره د ځینو مهمو خبرونو لنډیز
څو ولایتونه
څه موده وړاندې د هېواد د پوهنې ریاستونو له لوري د پوهنې د همکارو بنسټونو په ملاتړ، د سیمه ییزو ښوونځیو او ټولګیو د یو شمېر ښوونکو لپاره میتودیک سیمینارونه په لاره اچول شوي وو، چې ګډون والو ته د تصدیق پاڼو په وېشلو سره پای ته ورسېدل.
دایکنډي
د دايکنډي ولايت پوهنې رئيس قاري عنايت الله سهار د پوهنې په برخه کې د يو همکار بنسټ له استازي سره وکتل او په بېلابېلو موضوعاتو یې لکه: د ښوونځيو جوړول، ترميم او د یاد ولايت د ماشومانو او زده کوونکو لپاره د زده کړو په برخه کې د آسانتياوو برابرولو په تړاو بحثونه او هوکړه کړه.
هلمند
د هلمند ولایت د پوهنې ریاست اداري غونډه د یاد ولایت د ښوونې او روزنې د آمر تر سرپرستۍ لاندې جوړه شوه.
په یاده ناسته کې د هلمند له پوهنې ریاست سره د همکارو ادارو مسئولینو، د ترسره شوو لاسته راوړنو او کړنو راپور وړاندې کړ او د راتلونکې میاشتې لپاره یې خپل پلانونه ګډون والو ته تشرېح کړل.
لوګر
د لوګر ولایت پوهنې رئیس الحاج مولوي عبدالرحمن حمیدي د یو رسمي سفر په ترڅ کې، د یاد ولایت خوښۍ ولسوالۍ ته ولاړ، د پوهنې عمومي وضعیت او ستونزې یې وڅېړلې او د پوهنیز حالت د لاښه والي په موخه یې اړوندو مسئولینو ته لازمې لارښوونې وکړې.
جوزجان
د جوزجان ولایت پوهنې رئیس الحاج مولوي محمد طاهر جواد د درزاب ولسوالۍ د چکانه د هلکانو او نجونو منځني ښوونځي، قرستون، پیر غریب منځني ښوونځي او یو شمېر دیني مدارسو له ښوونیزو کړنو څخه څارنه وکړه او مسئولینو ته د تدریسي او اداري چارو لاښه والي په موخه لازمې لارښوونې وکړې.
