د ولایتونو له پوهنې ریاستونو د څو خبرونو لنډیز
پکتیا
د پکتیا ولایت پوهنې رئیس مولوي عبدالوکیل خالد د شهید منصور، امام غزالي، سهاک له مدارسو او لیوانو منځني ښوونځي له اداري او تدریسي فعالیتونو څخه لیدنه وکړه او د ښوونیزو چارو د لا ښه والي په موخه یې اړوندو مدېرانو ته لازمې لارښوونې او مشورې وکړې.
بلخ
د بلخ ولايت د انافي مؤسسې استازي د ياد ولايت له پوهنې رئيس الحاج مولوي عبدالجليل شهيد خېل سره په کتنه کې د يو شمېر ښوونځيو د زده کوونکو لپاره د درسي موادو د مرستې او په ياد ولايت کې د پوهنې رياست اړوند دوو نورو مهمو پروژو د پلي کېدو خبر ورکړ.
د بلخ ولایت پوهنې رئیس له مرستندویه بنسټونو سره د ياد ریاست د هر اړخیزې همکارۍ ډاډ ورکړ.
د یو بل خبر له مخې،
د بلخ ولايت پوهنې رئيس د لوړو زده کړو وزارت د کانکور آزموينې د ملي کمېټې له مرستيال شيخ رحيم الله سره وکتل.
ياد ولايت ته ورغلي پلاوي د خپل سفر موخه، د کانکور آزموينې د پروسې پيل وباله او د دې ملي پروسې په پلي کولو کې يې د پوهنې له رياست څخه د همکارۍ غوښتنه وکړه.
د بلخ پوهنې رئیس پلاوي ته د ښه راغلاست پرمهال، د همکارۍ ژمنه وکړه.
کابل
د کابل ښار پوهنې ریاست د یو لړ مراسمو په ترڅ کې د ياد ښار د بېلابېلو ښوونځیو د دولسمو ټولګيو پر ۵۰۷ تنوفارغانو شهادت نامې و وېشلې.
د ياد ښار پوهنې رئیس حافظ عبدالباسط حقاني د شهادت نامې د وېش د بهیر په اړه معلومات ورکړل او له فارغانو یې وغوښتل، چې د علم او پوهې په ترلاسه کولو سره د خپلو هېوادوالو خدمت وکړي.
لوګر
د لوګر پوهنې ریاست د آزادې سیالۍ آزموينې په لاره اچولو سره، له سلګونو وړ کسانو څخه د ښوونکو آزموینه واخیسته.
په پلان کې ده چې له دې جملې يې ۸۲ تنه هغه کسان چې معياري نمرې ترلاسه کړي ، د ياد ولایت په دیني مدارسو کې د ښوونکو په توګه وګمارل شي.
