د ولایتونو د پوهنې ریاستونو څو لنډو خبرونو ته کتنه
سمنګان:
د سمنګان ولايت د علماوو شورا رئيس او غړو د دغه ولايت د پوهنې له رئيس الحاج مولوي نصرت الله فيضاني او يو شمېر مسوولينو سره وکتل.
د ياد ولايت د علماو شورا رئيس مولوي محراب الدين د هېواد د بچيانو په اسلامي او هېوادنۍ روحيه د زده کړې ارزښت او په دې برخه کې د ديني عالمانو پر مسؤليت خبرې وکړې.
له بلې خوا د سمنګان ولايت د پوهنې رئیس هم په دې اړه خبرې وکړې او له عالمانو يې وغوښتل چې خلک زده کړو ته وهڅوي او خپل ماشومان ښوونځيو ته واستوي.
تخار:
د تخار ولایت د پوهنې رئیس الحاج مولوي حزب الله مبشر د یو کاري سفر په ترڅ کې کلفګان ولسوالۍ ته ولاړ او د دې ولسوالۍ د پوهنې وضعیت یې وڅېړه.
کابل:
د کابل ښار د پوهنې ریاست چارواکي وايي: د پوهنې دوست یوه هېوادوال په مالي مرسته د کابل ښار د تاجور سلطان، ناصر خسرو، وزیر اکبر خان او نادریه لېسو د اوبو څاګانې و کیندل شوې او ګټې اخیستنې ته وسپارل شوې.
له همدې رياست څخه په يو بل خبر کې ويل شوي، چې د کابل د پوهنې رياست د کنفرانسونو په تالار کې د يو لړ مراسمو په ترڅ کې د دغه ښار د ښوونځيو څه باندې ١٢٠٠ تنو فارغانو ته په انفرادي ډول شهادت نامې ووېشل شوې.
همدارنګه
د هغو نوماندانو د ګمارنې پروسه چې پخوا د ازادې سیالۍ له بهیره تېر شوي او په ریزرف کې وو، روانه ده او په تېره یوه اوونۍ کې د ياد رياست په مربوطاتو کې لسګونه کسان د ښوونکو، مامورينو او خدماتي کارکوونکو په توګه ګمارل شوي دي.
