د میدان وردګ ولایت غازي محمد جان خان عالي لېسې ودانۍ د ۱۲۰ زره امریکایي ډالرو په لګښت بیا ورغول شوه
د میدان وردګ ولایت جغتو ولسوالۍ اړوند د غازي محمد جان خان عالي لېسې د ودانۍ بیارغونې پروژه، چې د دوست هیواد ترکیې د خیریه بنسټ لخوا د ۱۲۰ زره امریکایي ډالرو په لګښت تمویل شوې، د یو لړ پرتمینو مراسمو په ترڅ کې چې پکې د اقتصاد وزارت د مقام د دفتر رئیس شیخ عبدالباري، د پوهنې وزارت د بهرنیو اړیکو رئیس محترم مولوي حسیب الله صاحبزاده، پوهنې رئیس مولوي محمد عثمان حریت او د یاد ولایت یو شمېر نورو چارواکو او مسئولینو پکې ګډون درلود، افتتاح او ګتې اخیستنې ته وسپارل شوه.
مسئولینو او مقاماتو په خپلو ویناوو کې، د یاد خیریه بنسټ څخه مننه څرګنده او خلک یې د خپلو ماشومانو زدهکړې او تعلیم په برخه کې وهڅول او له ښوونکو یې هم وغوښتل چې زدهکوونکي په اسلامي او ملي روحیې سره وروزي.
همدارنګه د پوهنې چارواکو ډاډ څرګند کړ چې د پوهنې په برخه کې به نورې زیربنایي پروژې هم پلي شي.
د یادونې وړ ده چې، د پوهنې وزارت په ټول هېواد کې د مدارسو او ښوونځيو لپاره د معیاري ودانیو جوړولو ته هڅې کوي، تر څو طلاب او زدهکونکي وکولی شي، په خوندي او مناسب معیاري چاپېریال کې زدهکړې وکړي.
