د مرکز او ولایتونو له پوهنیزو کړنو څو لنډ خبرونه
هرات
په هرات ولایت کې د عاصم خیریه بنسټ د یو لړ مراسمو په ترڅ کې چې د یاد ولایت د پوهنې ریاست مسئولینو او قومي مخورو پکې ګډون درلود، د دغه ولایت په مرکز او ولسوالیو کې ۴ زره مستحقو زده کوونکو ته د درسي کتابونو او توکو د وېش لړۍ پیل کړه.
د هرات پوهنې ریاست د ښوونې او روزنې آمر د ښوونځيو د زده کوونکو د ملاتړ او د پوهنې د پرمختګ په برخه کې د ياد خيريه بنسټ له مرستو او همکاريو د مننې ترڅنګ، له ټولو ملي سوداګرو او خيريه بنسټونو وغوښتل، تر څو په ښوونیز او روزنیز ډګر کې خپلو همکاريو ته دوام ورکړي.
کابل
د کابل ولایت پوهنې رئیس الحاج مولوي عبدالحق حقاني، د یاد ولایت د چهارآسیاب ولسوالۍ د پوهنې آمریت او یو شمېر ښوونځیو اداري او تدریسي چارې له نیږدې وکتلې او کارکوونکو ته یې لازمې لارښوونې وکړې.
نیمروز
د نیمروز ولایت پوهنې رئیس الحاج مولوي ګل احمد حقاني، د یاد ولایت د مرکز اړوند د ملکې او کنګ دین محمد لېسو له اداري او تدریسي چارو څخه لیدنه او څارنه وکړه.
سرپل
د سرپل ولایت پوهنې ریاست د آمرینو، مدیرانو او کارکوونکو لپاره د «عملیاتي پلان» تر سرلیک لاندې یو ورځنی سیمینار پیل کړ.
په یاد سیمینار کې ګډون والو ته د عملیاتي او کاري پلان د پلي کولو د څرنګوالي په اړه روزنه ورکړل شوه.
دایکنډي
یو خیریه بنسټ د دایکنډي ولایت مرکز اړوند د شش د نجونو ښوونځي له لومړي څخه تر شپږم ټولګيو پورې په ۴۳ تنه زده کوونکو ښوونیز توکي ووېشل.
