د مالیې وزارت محترم پلاوي د پوهنې وزارت د اسلامي زدهکړو له محترم معین سره وکتل
د مالیې وزارت د عوایدو او ګمرکونو معینیت د غیر مالیاتي عوایدو رئیس محترم مولوي رحمت الله او ورسره مل پلاوي، په داسې حال کې چې د پوهنې وزارت مالي او حسابداري رئیس محترم مولوي صدرالدین سعد هم حاضر و، د یاد وزارت د اسلامي زدهکړو له معین محترم الحاج مولوي کرامت الله آخندزاده سره وکتل او دواړو خواوو د علاقې وړ مسایلو په اړه بحث او خبرې اترې وکړې.
لومړی، د پوهنې وزارت د اسلامي زدهکړو معین د مالیې وزارت پلاوي ته ښه راغلاست ووایه او ویې ویل: "موږ به په ګډه هڅه وکړو چې د اسلامي زدهکړو معینیت پورې اړوند عایداتي فرصتونو ته په مؤثره او شفاف ډول پراختیا ورکړو، تر څو دا د هېواد د پرمختګ او د اسلامي زدهکړو لا پیاوړتیا لپاره ګټور تمام شي."
ورپسې د مالیې وزارت د پلاوي مشر، د وزارت له مشرتابه چارواکو څخه د دوی د مېلمه پالنې څخه د مننې ترڅنګ، د اسلامي زدهکړو معینیت پورې اړوندو قېمت لرونکو اسنادو د معیاري کولو او د عوایدو د ضایع کېدو د ساحو پېژندلو په تړاو مهمو ټکو ته اشاره وکړه او د پوهنې محترم معین ته یې د عوایدو راټولولو په برخه کې د خپل اړوند وزارت د همکارۍ ډاډ ورکړ.
غونډه د مناسبو پرېکړو په کولو سره پای ته ورسېده.
