د لوګر په ښوونځیو کې د کرونا، ملاریا او لشمانیا ناروغیو په اړه د عامه پوهاوي پروګرام پیل شو
د پوهنې وزارت_لوګر: د لوګر د ښوونځیو ښوونکو، زده کوونکو او د زده کوونکو د کورنیو غړو ته د کرونا، ملاریا او لشمانیا ناروغیو په اړه د عامه پوهاوي کمپاین پیل شو.
یاد کمپاین د پوهنې ریاست د روغتیایي چاور مدیریت د غوښتنې له مخې د عامې روغتیا ریاست او یونیسف موسسې په مالي مرسته پیل شو.
دا کمپاین د مرکز او ولسوالیو د نجونو او هلکانو په ټولو ښوونځیو کې ترسره کېږي، چې څه باندې یوه میاشت وخت به ونیسي.
په دې کمپاین کې ښوونکو، زده کوونکو او د زده کوونکو د کورنیو غړو ته د درېیو ساري ناروغیو لکه کرونا، ملاریا او لشمانیا د مخنیوي لارو چارو په اړه عامه پوهاوی ورکول کېږي.
د لوګر د پوهنې سرپرست رئیس نثار احمد سیدي یاد کمپاین ګټور بولي او وایي، چې په دې سره به د ښوونځیو ښوونکي، زده کوونکي او د زده کوونکي د کورنۍ غړي د کرونا، ملاریا او لشمانیا ناروغیو د مخنیوي په لارو چارو بلد شي.
هغه زیاته کړه،چې د نوموړو ناروغیو په برخه کې ښوونکو، زده کوونکو او د زده کوونکو د کورنیو غړو ته عامه پوهاوی ډېر مهم دی او ګټور به تمام شي.
په روان کال کې، په لوګر کې دا لومړی ځل دی، چې د ښوونځیو ښوونکو، زده کوونکو او د زده کوونکو د کورنیو غړو ته د کرونا، ملاریا او لشمانیا ناروغیو په اړه د عامه پوهاوي پروګرام پیلېږي.
