د لوګر په محمدآغې کې د نجونو تړلی ښوونځی بیا فعال شو

د لوګر د محمدآغې ولسوالۍ د سرخاب د نجونو تړل شوی ښوونځی بېرته د زده کوونکو پر مخ پرانیستل شو. 
یاد ښوونځی تېر کال د امنیتي ستونزو له کبله تړل شوی و، چې یو ځل بیا د پوهنې ریاست،دیني عالمانو او قومي مشرانو په هلو ځلو فعال شو. 
اوس مهال په دې ښوونځي کې له لومړي ټولګي تر نهم ټولګي شاوخوا ۲۱۵ نجونې زده کړې کوي او ښایي دا شمېره لوړه شي.
د لوګر د پوهنې رئیس عبدالوکیل کلیوال د یاد ښوونځي پر بیا فعالېدو خوښي څرګندوي او د سرخاب له اوسېدونکو څخه غوښتنه کوي، چې خپلې لوڼي ښوونځي ته پرېږدي. 
د پوهنې رئیس د سیمې د اوسېدونکو دنده وګڼله، چې د پرانیستل شوي ښوونځي ساتنه وکړي او د خپلو اولادونو راتلونکی له تیارو را وباسي. 
په لوګر کې دا مهال د نجونو او هلکانو ۲۷۳ ښوونځي شته، چې ټول د نجونو او هلکانو پر مخ پرانیستي دي.