د لوګر په خوښۍ ولسوالۍ کې یوه ښوونځي ته ځمکه وقف شوه
د پوهنې وزارت_لوګر: د لوګر د خوښۍ ولسوالۍ یوه قومي مخور د نجونو او هلکانو د یوه ښوونځي د جوړولو لپاره یو جریب ځمکه وقف کړه.
یاد قومي مشر سلطان محمد نومیږي، چې خپله ځمکه یې د حضرت بلال (رض) د نجونو او هلکانو لومړني ښوونځي ته وقف کړې ده.
یاد ښوونځی به د پوهنې وزارت په لارښوونه د راتلونکي ۱۳۹۹ ښوونیز کال په لومړیو کې نوی تاسیس او په فعالیت پیل وکړي.
د نوموړي ښوونځي د فعالیت په پیلېدو سره به د ۲۰۰ نجونو په ګډون ۵۰۰ ماشومانو ته د زده کړو زمینه برابره شي.
د لوګر د پوهنې سرپرست رئیس نثار احمد سیدي د نوموړي قومي مشر دا کار وستایه او ویې ویل، چې په دې کار کې د دنیا او آخرت ګټې شته.
هغه زیاته کړه، چې پر یادې ځمکې به په راتلونکي کال کې د ولسي تړون یا اقراء پروګرام له لارې ودانۍ جوړه شي.
د یادونې وړده، چې د روان کال له پیله تر اوسه د لوګر ۱۳ نورو قومي مشرانو هم ۱۳ ښوونځیو ته نږدې ۳۰ جریبه ځمکې وقف کړي دي.
