د لوګر ولایت په دوه بابه ښوونځیو کې د څو پروژو علمي کارونه پیل شول
د پوهنې وزارت او د پوهنې په برخه کې د یو همکار بنسټ ترمنځ د هوکړه لیک پر بنسټ، د لوګر ولایت ازره ولسوالۍ اړوند په محمد خېل او موسی خان ښوونځیو کې د یو شمېر پروژو عملي کارونه پیل شول.
په یادو پروژو کې: د احاطوي دېوالونو جوړول، د لمریزې برېښنا ښیښو نصبول، د پاکو اوبو د ژورو څاګانو کیندل او اړینو ملحقاتو جوړول شامل دي، چې د شپږو میاشتو په موده کې به ګټې اخیستنې ته وسپارل شي.
د يادو پروژو ټولیز لګښت ۸ ميليونه افغانۍ اټکل شوى، چې د یاد بنسټ له لوري ورکول کېږي.
د يادونې وړ ده، چې د دغو ښوونځيو د بيارغونې د کارونو په بشپړېدلو سره به شاوخوا ۲ زرو زده کوونکو ته د زده کړو لازمې آسانتياوې برابرې شي.
