د لوګر د ښوونکو او زده کوونکو د وړتیا لوړولو هوکړه لیک لاسلیک شو

د لوګر د پوهنې ریاست د خپلو ښوونکو د تحصیلي کچې د لوړولو او د زده کوونکو د وړتیا لوړونې هوکړه لیک لاسلیک کړ. 
دغه هوکړه لیک د پوهنې رئیس عبدالوکیل کلیوال او د لوړو زده کړو رئیس محمد ناصر ستانکزي تر منځ لاسلیک شو. 
د یاد هوکړه لیک د لاسلیکېدو موخه د لوګر د پوهنې بهیر او دغه راز د لوړو زده کړو بهیر ته په ګډه وده ورکول دي.
د ښوونکو د تحصیلي کچې لوړول، د ښوونځیو زده کوونکو ته د روزنیزو پروګرامونوجوړول او د ښوونې او روزنې محصلینو ته په ښوونځیو کې د عملي زده کړو د زمینې برابرول د یاد هوکړه لیک هغه مهمې دي، چې دواړه خواوې به په دغو برخو کې له یو بل سره همکاري وکړي. 
د لوګر د پوهنې رئیس عبدالوکیل کلیوال یاد هوکړه لیک مهم وباله او زیاته یې کړه، چې دغه هوکړه لیک د ښوونکو او زده کوونکو د وړتیاوو لوړولو لپاره ښه روزنیز پروګرامونه لري.
د پوهنې رئیس زیاته کړه، چې په دې هوکړه لیک سره به د ښوونځیو په تدریسي کیفیت کې لوړوالی رامنځته شي او له امله به یې د ښوونکو او زده کوونکو تحصیلي وړتیاوې لوړې شي. 
د لوګر د لوړو زده کړو رئیس محمد ناصر ستانکزی وایي، چې د یاد هوکړه لیک موخه د ښوونځیو ښوونکو د تحصیلي کچې لوړول، زده کوونکو ته د روزنیزو پرګرامونو جوړول او هم په ښوونځیو کې د ښوونې او روزنې محصلینو لپاره د عملي تدریس زمینې برابرول دي. 
د یادونې وړده،چې د لوګر د پوهنې ریاست په تېرو کلونو کې هم د خپلو ښوونکو او زده کوونکو د وړتیا لوړولو په برخه کې پراخې هلې ځلې کړي.