د لوګر د ښوونځیو زده کوونکو لپاره د قرطاسیې مرسته وشوه

د لوګر د مرکز او ولسوالیو د ۲۷۳ ښوونځیو د لومړنیو ټولګیو د ۱۹۸۷۵ زده کوونکو لپاره د قرطاسیې مرسته وشوه.
دغه مرسته د ملګرو ملتونو د ماشومانو نړېوال صندوق یا یونیسف کړې ده، چې ۲۷۳۱۵ امریکایي ډالره اررښت لري.
په یاده مرسته کې ۷۹۵ کیټه درسي مواد شامل دي، چې هر یو کیټ یې د ۲۵ زده کوونکو لپاره اړین درسي توکي لري.
په دغو درسي توکو کې د لېکنې کتابچې،د رسم ایستنې کتابچې، خود کار قلمونه، پنسلونه، پنسل پاکونه، قلم تراشونه، رنګې او تختې شته.
د لوګر د پوهنې رئیس عبدالوکیل کلیوال د یادو درسي توکو د تسلیمېدلو پر مهال د یونیسف د مرستو ستاینه وکړه. 
هغه وایي،چې نوموړو مرستو د زرګونو زده کوونکو ستونزې هوارې کړي او هم یې د زده کوونکو شمېر په ډېرولو کې ښه اغیز کړی. 
د یادونې وړده،چې یادې ادارې په تېرو کلونو کې هم د لوګر د ښوونځیو له ښوونکو او زده کوونکو سره ورته ډېرې مرستې کړي.