د لوګر د پوهنې ریاست لپاره ۸ نوي کارکوونکي وټاکل شول
د لوګر د پوهنې ریاست د سمون او همغږۍ آمر، د بشري سرچینو مدیر او د شپږو ولسوالیو د پوهنې آمریتونو لپاره د نظارت نوي آمران معرفي شول.
د اړوندې موضوع په تړاو جوړه شوې غونډه کې، د پوهنې رئیس مولوي جنت ګل عزیز، تدریسي مرستیال آمرانو او د دغه ریاست کارکوونکو برخه اخیستې وه.
یادو کسانو، چې پخوا هم د پوهنې ریاست په نورو برخو کې دندې لرلې، د پوهنې کارونو د لاښه والي ، د پوهنې بهیر د پرمختګ او شته ستونزو د له منځه وړلو په موخه د پوهنې وزارت له خوا پر دغو دندو ټاکل شوي دي.
د لوګر د پوهنې رئیس مولوي جنت ګل عزیز له نوموړو ټاکل شویو کارکوونکو څخه غوښتنه وکړه، چې خپلې دندې په عادلانه او صادقانه توګه سرته ورسوي اوهم د پوهنې وضعیت د ښه والي لپاره پراخې هلې ځلې وکړي.
د غونډې په پای کې یادو کارکوونکو، د پوهنې ریاست مسؤلینو ته ژمنه ورکړه، چې د پوهنې وضعیت د ښه والي او شته ستونزو د حل په موخه به ګوټلي ګامونه پورته کړي
