د لوګر د پوهنې ریاست لپاره د نظارت نوی آمر معرفي شو
پوهنې وزارت ـ لوګر: د لوګر ولایت د پوهنې ریاست د نظارت عمومي آمریت لپاره د آزادې سیالۍ له مخې نوی آمر معرفي او په کار یې پیل وکړ.
هغه غونډه چې له همدې امله جوړه شوي وه، د پوهنې رئیس عبدالوکیل کلیوال، تدریسي مرستیالې مینې سادات، د اسلامي زده کړو مرستیال مولوي خان زمان، د دارالمعلمین رئیس انجنیر محمد اکبر ستانکزي، د دغه ریاست مدیرانو او کارکوونکو برخه اخیستې وه.
یاد نوی ټاکل شوی آمر عنایت الله خالد نومیږي او له تېرو ۷ کلونو راپدېخوا د نظارت غړی و.
هغه د ننګرهار پوهنتون د ښوونې او روزنې په پوهنځي کې د لیسانس تر کچې لوړې زده کړې کړي دي او د آزادې سیالۍ له لارې پر یادې دندې ګومارل شوی دی.
د لوګر د پوهنې رئیس عبدالوکیل کلیوال د مخکیني نظارت آمر د ترسره شوي دندې څخه قدرداني وکړه او نوي آمر ته یې د دندې پیل کېدو له امله مبارکي ورکړه.
