د لوګر د مخابراتو او معلوماتي ټکنالوژۍ رئیس خپل کور ښوونځي ته وقف کړ
د لوګر ولایت د مخابراتو او معلوماتي ټکنالوژۍ رئیس ښاغلي الحاج عبدالرحمن ناصري خپل کور ښوونځي ته وقف کړ.
هغه خپل یو جریب کور، چې په بره کي برک ولسوالۍ کې دی د عبدالرحمن په نوم د نجونو منځني ښوونځي ته ډالۍ کړی دی.
یاد کور ۹ خونې لري، چې اوس مهال د دغه ښوونځي ۵۵۴ نجونې زده کوونکې په همدغو خونو کې سبق وایي.
د لوګر د مخابراتو او معلوماتي ټکنالوژۍ رئیس وایي،چې خپل کور یې نجونو ته د زده کړو زمینې د برابرولو په موخه معارف ته وقف کړ.
د عبدالرحمن ښوونځی پر ۱۳۸۱ لمریز ښوونیز کال تاسیس شوی، چې د اتو سیمو نجونې ورته د زده کړو لپاره ورځي.
د لوګر د پوهنې ریاست د ولسمشر د لارښوونې له مخې ښوونځیو ته د ځمکو د پیدا کولو په موخه یوه کمېټه جوړه کړې ده.
یادې کمېټې په تېر کال کې د ښوونځیو لپاره شاوخوا ۱۲۰ جریبه ځمکه د خلکو تر هڅولو وروسته ښوونځیو ته اخیستي دي.
