د لوګر د جهادي مرکزي مدرسې د څلورنیم میاشتنۍ ازموینې نتایج اعلان شول.
په لوګر ولایت کې د جهادي مرکزي مدرسې د ۵۵۰ طالبانو د روان ۱۴۰۱ ښوونیز کال د څلورنیم میاشتنۍ ازموینې نتایج د یوې لویې غونډې په ترڅ کې اعلان شول.
په دې تړاو جوړه شوې غونډه کې، چې پرون د دوشنبې په ورځ له غرمې وروسته په یاده مدرسه کې جوړه شوې وه د پوهنې وزارت د اسلامي زده کړو معینیت د استازي مفتي عبدالولي سداد په ګډون، مرستیال والي انعام الله صلاح الدین ، د پوهنې رئیس مولوي جنت ګل عزیز، د اسلامي زده کړو مرستیال مولوي سید ضیاء احمد صارم ، د یادې مدرسې مهتمم مولوي عبدالله حلیم، جیدو دیني عالمانو، طالب العلمانو او د دوی د کورنیو غړو برخه اخېستې وه.
غونډه د قرآن کریم په تلاوت پیل شوه، ورپسې د جهادي مرکزي مدرسې مهتمم مولوي عبدالله حلیم راغلو میلمنو ته ښه راغلاست او هرکلی ووایه او هم یې د اخېستل شوې څلورنیم میاشتني ازموینې د نتایجو په هکله د غونډې برخه والو ته معلومات وړاندې کړل.
وروسته د پوهنې وزارت د اسلامي زده کړو معینیت استازي مفتي عبدالولي سداد، مرستیال والي انعام الله صلاح الدین، د پوهنې ریاست مسئولینو او یو شمېر جیدو دیني عالمانو د غونډې برخه والو ته د علم فضیلت په هکله ارزښتناکې او ګټورې ویناوې وکړې.
د غونډې په پای کې د لوړو او ښو نومرو اخیستونکي او ممتاز زده کوونکي په ستاینلیکونو او ډالیو ونازول شول.