د لوړو زده کړو وزارت مالي او اداري معین د پوهنې وزارت د اسلامي زده کړو له معین سره وکتل.
د لوړو زده کړو وزارت مالي او اداري معین حافظ مولوي حامد حسیب په داسې حال کې چې د یاد وزارت د جامعاتو او تخصصاتو لوی رئیس مولوي فرید یې هم ملتیا کوله، د پوهنې وزارت د اسلامي زده کړو له معین الحاج مولوي کرامت الله آخندزاده سره وکتل.
په یاده کتنه کې د پوهنې وزارت د اسلامي زده کړو معین د ۱۴۴۶ ه ق کال لپاره د مدارسو د ط.البانو او فاضلانو د آزموینو څرنګوالي په برخه کې د لوړو زده کړو وزارت د مسئولينو د همکاريو د قدردانۍ په ترڅ کې وويل، د داخلې شرايطو ته په کتو سره لازمه ده، چې غوښتونکو ته د هغوی له شرایطو سره سم د داخلې فورمې ورکړل شي او د یادو فورمو تر وېشلو وروسته باید په انفرادي ډول داخله بنده شي.
نوموړي همدا راز زیاته کړه: اړینه ده، تر څو د آزموینې اخیستونکو ته روزنه ورکړل شي او آزموینې لپاره پراخه او مناسب چاپېریال برابر کړل شي.
له بلې خوا د لوړو زده کړو وزارت مالي او اداري معین د آزموینې پر روڼتیا او چمتووالي ټینګار وکړ او له پوهنې وزارت سره یې د دغه وزارت د همکارۍ ډاډ ورکړ.
غونډه د دعائیې په لوستلو سره پای ته ورسېده.
