د فراه له پوهنې ریاست څخه خبرونه
د فراه ولايت د پرچمن ولسوالۍ د پوهنې آمر وايي: د فراه ولايت د پوهنې رئيس په دغه ولسوالۍ کې دتخت پرچمن ليسې له ښوونیز بهير او اداري فعاليتونو څخه ليدنه وکړه او له درسونو سره د زده کوونکو لیوالتیا، مناسب درسي چاپيريال او د ښوونځي د مسوولینو اخلاص یې د قدر وړ وباله او همدارنګه د ښوونځي زده کوونکي یې زده کړو ته وهڅول.
د فراه ولايت د پوهنې آمر مولوي محمد قاسم معتصم د دغه ولایت په مرکز او ولسوالیو کې د ښوونځيو له زده کوونکو سره د ليدنې پر مهال د يو شمېر ښوونځيو تعليمي او اداري چارې یې وارزولې او له اړوندو مسوولينو يې وغوښتل، ترڅو د باکیفیته زده کړو له لارې ځوان نسل ته روزنه ورکړي.
د فراه رود ولسوالۍ د پوهنې آمر مولوي شاه محمد رابط د يادې ولسوالۍ د منځني ښوونځي له چارو څخه څارنه وکړه او د ياد ښوونځي د اداري او تدريسي اسنادونو د څېړلو ترڅنګ يې د کارکوونکو پر حاضرۍ هم ټينګار وکړ.
د پوهني رياست د ساينس او تکنالوژۍ مديريت علمي غړو د ملا معين فراهي د هلکانو لېسې د لابراتوار له ټولګيو څخه ليدنه وکړه او د ياد لابراتوار د فعاليتونو د ليدنې پر مهال يې ځینې مهمې ستونزې ياداښت کړې او د حل ژمنه يې وکړه.
د پوهنې ریاست د تعلیمي څارنې غړو د شیخ ابونصر فراهي عالي لېسې له اداري او تدریسي چارو څخه څارنه وکړه او د یادې لېسې ښوونکو ته یې د چارو د ښه والي په موخه لارښوونې وکړې.
