د سرطان پروړاندې د مبارزې بنسټ مشر ډاکټر جاوید صافی سره لیدنه
د پوهنې وزارت، کابل: د پوهنې وزارت سرپرستې آغلې رنګینې حمیدي د سرطان پروړاندې د مبارزې بنسټ د مشر ډاکټر جاوید صافی سره وکتل.
ښاغلي جاوید صافي د پوهنې په وزارت کې د نوي مشرتابه څخه خوښي څرګنده کړه او ټینګار یې وکړ چې د سرطان بنسټ به د تیر په څیر د پوهاوي په برخه کې د قوي همکار په توګه د پوهنې وزارت سره پاتې شي.
ښاغلي صافي زیاته کړه چې تر دې دمه په نړۍ کې تر سلو ډیر د سرطان ډولونه پیژندل شوي، خو په افغانستان کې اکثره ناروغان د معدې، مرۍ، سږو، خولې او د وینې په سرطان اخته دي.
هغه د دې ناروغۍ پوهاوی او مخنیوی یوه ساده او ارزانه لاره وبلله او زیاته یې کړه که چیرې ټول سرطانونه په وخت سره تشخیص شي نو درملنه یې کیدی شي.
د پوهنې وزارت سرپرستې آغلی رنګینې حمیدي د پوهنې وزارت په تعلیمي مرکزونو کې د پوهاوي د کچې لوړولو په برخه کې د سرطان له بنسټ څخه د همکارۍ له امله مننه وکړه او ټینګار یې وکړ چې د دوی همکاري د هیواد د ماشومانو راتلونکي لپاره اغیزمن کیدی شي.
