د راتلونکي۱۴۰۴ ښوونیز کال پرمهال لوګر ولایت کې نوي ښوونځي تاسیس کېږي
د لوګر پوهنې ریاست چاواکي خبر ورکوي، د پوهنې وزارت په پام کې لري، چې په نوي ۱۴۰۴ ښوونیز کال کې د یاد ولایت په مرکز او ولسوالیو کې ۱۵ بابه نوي لومړني ښوونځي تاسیس او فعال کړي.
د دغه وزارت د معلوماتو له مخې، یاده پرېکړه د لوګر ولایت دیني علماءکرامو او قومي مشرانو د غوښتنې پر اساس شوې، تر څو په هغو سیمو او بانډو کې نوي ښوونځي تاسیس او فعال شي، کوم چې د ماشومانو لپاره ښوونځي پکې شتون نه لري او له دې امله دوی له ستونزو سره مخ دي.
له بلې خوا د ياد ولايت اوسېدونکو د پوهنې وزارت له دغه اقدام هرکلى وکړ او د دغه وزارت د ښوونيزو پلانونو او پروګرامونو له پلي کېدو يې خپل هراړخیز ملاتړ څرګند کړ.
په ورته وخت کې د لوګر پوهنې ریاست په پام کې لري، چې د نوي ښوونیز کال لپاره د همدغه ولایت تعلیمي مرکزونو ته ۱۸ زره د شرایطو وړ ماشومان جذب کړي.
