د دایکنډي ولایت په یو شمېر ښوونځیو کې د حفظ الصحې ۹ پروژې ګټې اخيستنې ته وسپارل شوې
د دایکنډي ولایت پوهنې ریاست په یوه خبرپاڼه کې ویلي، چې د ياد ولایت مرکز نیلي ښار او د شهرستان، میرامور، خدیر، کیتي او کجران ولسوالیو په ۹ بابه ښوونځيو کې د حفظ الصحې د ۹ پروژو د جوړولو چارې بشپړې او ګټې اخیستنې ته وسپارل شوې.
د دايکنډي ولايت پوهنې رئيس قاري عنايت الله سهار په وينا، د يادو پروژو ټول لګښت پنځه ميليونه ٦٤٥ زره ٩٠ افغانۍ وو، چې د پوهنې په برخه کې د همکاريو بنسټونو له خوا ورکړل شوې دي.
دغه راز پوهنې رئيس د ماشومانو لپاره د ناروغيو د مخنيوي په موخه د پاکوالي ساتنه مهمه وبلله او په دې برخه کې يې د والدينو او مسئولينو د پاملرنې لارښوونه وکړه.
د يادونې وړ ده، چې د دايکنډي ولايت په نورو ښوونځيو کې هم د ورته پروژو د پلي کېدو له امله د پوهنې رياست د انجنيرۍ ټېمونه د دغو ښوونځيو په سروې بوخت دي.
باید وویل شي، چې په یادو پروژو کې ۴۸ تشنابونه او د پاکو اوبو د ۷ حلقو څاګانو کيندل شامل دي.
