د جینوا کال نړیوال بنسټ مشر د پوهنې وزارت له سرپرست سره وکتل

د جینوا کال(Geneva call) نړیوال بنسټ مشر ښاغلي الین ډیلټروز(Alain Deletroz)د ا.ا.ا د پوهنې وزارت له سرپرست وزیر الحاج مولوي حبیب الله آغا سره وکتل.
په دې لیدنه کې د یاد بنسټ مشر ښاغلي الین ډیلټروز لومړی د خپل بنسټ په اړه لنډې خبرې وکړې او زیاته یې کړه، چې جینوا کال یو خپلواک، ناپییلی بشري بنسټ دی چې په جګړو او نښتو کې د ملکي خلکو د ساتنې او مصئونیت په برخه کې فعالیت کوي او تل په دې هڅه کې دی چې د هیوادونو تعلیمي بهیرونه د جګړو له اغیزو څخه خوندي وساتي. دنوموړي په وینا، زمونږ بنسټ په افغانستان کې د ظرفیتونو د لوړولو په برخه کې هم فعالیت لري اوپه راتلونکي کې غواړي چې خپل فعالیتونه نور هم پراخ کړي.
ورپسې د پوهنې سرپرست وزیر، لومړی ښاغلي الین ډیلټروز ته ښه راغلاست ووایه او زیاته یې کړه، چې له جګړو څخه د هیواد او خلکو ساتل د اسلامي امارت بنسټېزه دنده ده، د امریکايي اشغال په ختمېدلو سره دلته یو پیاوړی مرکزي نظام حاکم شویدی، د څلورو لسیزو بحران او جګړه پای ته رسېدلې ده او اوس ددې وخت را رسیدلی دی چې افغانان د نړیوالې ټولنې په مرسته دخپل هیواد معنوي او مادي بنسټونه ودان کړي. نوموړي زیاته کړه، جګړه هېڅکله د افغانان انتخاب نه وو، بلکې تل په افغانانو جګړې تحمیل شوېدي او دوی دې ته مجبوره کړای شویدي چې له خپل دین، هیواد او ارزښتونو څخه د دفاع په لاره کې وسلې ته لاس کړي.