د بورسونو نوماندانو چارو ته د رسیدو لپاره پوهنې وزیر د نتایجو او شهادتنامو ریاست څخه په ناڅاپي ډول لیدنه وکړه.
پوهنې وزارت ــ کابل: پوهنې وزیر ډاکتر محمد میرویس بلخي په ناڅاپي ډول د نتایجو او شهادتنامو له ریاست څخه لیدنه وکړه او د مراجعینو مینځ کې د ګډون ترڅنګ، د بورسونو کاندیدانو د شهادتنامو اخیستلو چارو ښه والي لپاره یې کارکوونکو ته لازمې لارښوونې وکړې.
پوهنې وزیر همدارنګه له مختلفو برخو لکه فارغینو، له هیواده بهر او شهادتنامو برخو څخه لیدنه وکړه او خلکو ته د ځواب وینې او حساب ورکونې په سیسټم کې مینځ ته راغلي او ترسره شویي اصلاحات یې وڅيړل.
پوهنې وزیر د دې لیدنې په ترڅ کې، د اصلاحاتو راوړلو، شفافه او ځواب ویونکي سیسټم د پیاوړتیا او د مدیریت د ښه والي او پیاوړې کولو په موخه د یاد وزارت له مختلفو برخو د لیدنو څخه خبر ورکړ.
د یادونې وړ ده له دې څخه وړاندې پوهنې وزیر ډاکتر بلخي په ناڅاپي ډول د بشري سرچینو ریاست، د کابل ښار پوهنې ریاست او له یو شمیر ښوونځيو څخه لیدنه کړې او د ستونزو څیړلو په موخه یې د مراجعینو په مینځ کې ګډون کړې وو.
