د بلخ له پوهنې ریاست څخه د یوې ورځې د فعالیتونو لنډ راپور
په مزارشريف كې د ابوذر غفاري له دارالعلوم څخه ۳۲ تنه فاضلان له کبرا او صغرا دورې څخه فارغ شول.
د دغه ولايت د پوهنې رئيس مولوي عبدالجليل شهیدخېل د ټولنې په جوړښت کې د دیني علومو پر ارزښت خبرې وکړې او له فارغینو يې وغوښتل، چې د هېواد د ځوان نسل په روزلو کې تر خپله وسه کار وکړي
.
د بلخ د پوهنې ریاست د تعلیمي څارنې مخکنی آمر توریالی مهمند د مزارشریف ښار د استاد وجدان لېسې د آمر په توګه وګومارل شو او په دنده یې پیل وکړ.
د دغه ولايت د اسلامي زده کړو آمر د يادې لېسې له تقاعد شوي آمر څخه مننه وکړه او نوي آمر ته يې د برياليتوب هيله وکړه.
د بلخ ولایت د کلدار ولسوالۍ د ښوونکو او سرښوونکو لپاره د ظرفیت لوړونې درې ورځنی سیمینار جوړ شو.
د يادې ولسوالۍ د پوهنې آمر مولوي حبيب الله نصرت د غونډې له ګډونوالو وغوښتل، چې په خپلو دفترونو او ښوونځيو کې د ياد سيمينار له محتوا څخه په عملي ډګر کې ګټه پورته کړي.
د بلخ ولایت په خلم ولسوالۍ کې د پوهنې آمریت د آمرینو، مدیرانو، ښوونکو او معتمدینو لپاره د پوهاوي د کچې د لوړولو او په وخت سره د اجراآتو د ښه والي په موخه د اداري ستونزو د حل تر سرلیک لاندې روزنیز سیمینار جوړ شو.
د بلخ ولسوالۍ د پوهنې آمر د پوهنې ریاست له مشرتابه څخه غوښتنه کړې وه، ترڅو د ښوونکو د ښارګوټي د غصب شویو ځمکو مخه ونيسي، چې بالاخره د يادې ولسوالۍ د ولسوال، د کرنې او اراضیو رياستونو په همغږۍ يې مخه ونيول شوه.
د بلخ ولایت د پوهنې ریاست د بلنې او لارښوونې په آمریت کې د دې اوونۍ په جریان کې د مارمل د پوهنې د آمر او د بلنې او لارښوونې د مسوولینو له خوا د صحابه کرامو د پیژندنې او د صحابه کرامو د ځانګړتیاو درسونه تدریس شول.
