د بلخ له پوهنې ریاست څخه خبرونه
بلخ
د بلخ والي الحاج محمد یوسف وفا د سیمه ییزو ادارو له مسوولینو سره د کتنې پر مهال د دغه ولایت د پوهنې ریاست له کړنو او په ځانګړې توګه ښوونځیو ته د درسي کتابونو د رسولو د بهیر د پیل په باب خوښي څرګنده کړه.
له بلې خوا د ياد ولايت د پوهنې رئيس مولوي عبدالجليل شهیدخېل د بلخ ولايت له مشرتابه څخه د مننې په ترڅ کې ژمنه وکړه، چې د بلخ ولايت د پوهنې د ودې او پرمختګ په برخه کې به ډېرې هڅې وکړي.
له همدې ولایت څخه یو بل خبر.
د چاهي ولسوالۍ د پوهنې آمر مولوي محمد ياسين حقاني د يادې ولسوالۍ د تعلیمي څارنې له غړو سره د چاهي د مرکزي لېسې له ښوونيزو فعاليتونو څخه څارنه وکړه.
سرپل
په سرپل ولایت کې د الجهاد ولسوالۍ د سیمې د خلکو د غوښتنو پر اساس مجر منځنی ښوونځی عالي لېسې ته ارتقاء وکړه.
د سرپل ولايت د پوهنې رئيس مولوي محمد رحماني د دغه ښوونځي د ارتقاء له امله د مبارکۍ او خوښۍ د څرګندولو په ترڅ کې د سیمي له خلکو وغوښتل چې له دغه فرصت څخه په ګټې اخیستنې خپل ماشومان ښوونځيو ته واستوي.
له بلې خوا د سيمې اوسېدونکو ژمنه وکړه، چې خپل ماشومان به ښوونځیو ته استوي او د پوهنې د پرمختګ په برخه کې به ګړندي ګامونه واخلي.
فراه
په دې وروستیو کې مولوي محمد اخلاص د فراه ولایت د پوهنې ریاست د تعلیمي څارنې د آمر په توګه وټاکل شو او د یو لړ مراسمو په ترڅ کې د اړوندې ادارې کارکوونکو ته ور وپېژندل شو.
د دغه ولایت د پوهنې ریاست مشرتابه پلاوي د مخکني آمر مولوي خان محمد مستغفر د صادقانه خدمتونو ستاینه وکړه او نوي ټاکل شوي آمر ته یې د بریالیتوب هیله وکړه.
بغلان
د بغلان ولايت د جلګې ولسوالۍ د پوهنې آمر وايي : هغه کتابچې او ښوونيز توکي چې څه موده وړاندې د يونيسف د سيمه ييز دفتر له خوا ورکړل شوي وو، د دې ولسوالۍ د ښوونځيو پر زده کوونکو ووېشل شول.
