د بلخ له پوهنې ریاست څخه خبرونه
د پوهنې وزارت د اساسي او ثانوي زده کړو ریاست د کارکوونکو په استازیتوب د بلخ ولایت د پوهنې ریاست کارکوونکو او د یونیسف ادارې سیمه ییزو کارکوونکو ته په همدې ولایت کې د درسي کتابونو د وېش په باب یو ښوونیز سیمینار جوړ شو.
په دې سیمینار کې د درسي کتابونو د ترلاسه کولو، د کتابونو تخنیکي چک، په دې ولایت کې ښوونځیو ته د 1.4 میلیون ټوکه درسي کتابونو د وېشلو طرزالعمل، د کتابونو د وېش بهیر د ګړندۍ کولو لپاره د ځانګړو ټیمونو جوړول، د فورمو چمتو کول او د کتابونو د ځای پر ځای کولو او نورو اړینو مسایلو په باب معلوماتي سیمینار وړاندې شو.
د افغانستان لپاره د ترکیې د سیمه ییزو کلتوري مرستو بنسټ یا TIKA دفتر د بلخ پوهنې ریاست ته ۱۴۰ میزونه او څوکۍ ورکړې.
مرسته شوي توکي د دغه ولایت د پوهنې ریاست د مشرتابه پلاوي په حضور کې د استقلال او پروین شمس لېسو مدیریتونو ته وسپارل شول.
د بلخ ولايت د دهدادي ولسوالۍ د تعلیمي څارنې آمر مولوي نقيب الله مخلص د شهيد بلخي لېسې له اداري او تدريسي چارو څخه ليدنه وکړه او مسوولينو او ښوونکو ته يې لازمې لارښوونې وکړې.
