د بدیلو زده کړو پلان ترتیب او نهایي شو
د هېواد د بچیانو لپاره په ځانګړي ډول په بېړنیو او ناڅاپي حالاتو کې د متوازنو ښوونیزو او پوهنیزو خدمتونو د وړاندې کولو په موخه د ښوونکو د مسلکي پراختیا د عمومي ریاست تر چتر لاندې د بدیلو زده کړو ریاست د وړاندیز پر اساس، د پوهنې وزارت مشرتابه او د نصاب او مسلکي ودې د عمومي رئیس مولوي اول ګل ایوبي او د بدیلو زده کړو د رئیس مولوي شمس الرحمن حماس په مشرۍ یوه کمېټه جوړه شوه او دنده یې ورته وسپارله چې د بدیلو زده کړو په بېلابېلو اغېزمنو لارو چارو او ابعادو یې غور وکړي او د معاصرې تکنالوژۍ او ښوونیزو ستراتیژیو څخه په ګټې اخیستنې د بدیلو زده کړو په جوړولو کې زیار وباسي.
ټاکل شوې کمیټې د غیر حاضري زده کړې په اړه له ډېرو غونډو او هر اړخیزو بحثونو څخه وروسته د دې بدیلو زده کړو پلان ترتیب کړی دی.
په پام کې ده چې د پوهنې وزارت د مشرتابه له منظورۍ څخه وروسته یاد پلان د تصویب لپاره د ا.ا.ا لوړ مقام ته وړاندې شي، چې وروسته به په آنلاین ډول د دې پلان چارې عملي شي.
