د بامیان ولایت په ۸ بابه ښوونځیو کې د لمریزې برېښنا سیسټمونه پرانیستل شول
د بامیان ولایت پوهنې ریاست په یوه مطبوعاتي اعلامیه کې ویلي: د یاد ولایت والي محترم الحاج مولوي عبدالله سرحدي ، پوهنې رئیس محترم قاري عنایت الله سهار او مسئولینو په حضور کې، د مرکز سربېره په پنجاب، شیبر، کهمرد او سیغان ولسوالیو کې د ۸ بابه ښوونځیو لپاره د لمریزې برېښنا سیسټمونه د ۱۴۰ زره امریکایي ډالرو په لګښت افتتاح او په رسمي ډول ګټې اخیستنې ته وسپارل شول.
یادې پروژې چې ټول ظرفیت یې په ساعت کې شاوخوا ۷۵.۵ کیلو واټه برېښنا ده، د یوې خیریه ادارې په مالي ملاتړ په دغو ښوونځیو کې نصب او فعالې شوې.
د پوهنې وزارت مشرتابه، د پوهنیزنظام لپاره د خیریه بنسټونو له ملاتړ ستاینه کوي او د یادو ښوونځیو د کارکوونکو برېښنا ته لاسرسی د یادو ادارو د تعلیمي او اداري چارو لاپرمختګ لپاره اغېزمن ګڼي.
