د آزموینو ملي ادارې پلاوي هرات او نورستان ولایتونو ته رسمي سفرونه وکړل
د آزموینو ملي ادارې مالي او اداري رئیس او ورسره مل پلاوي، د هرات او نورستان ولایتونو د پوهنې له مسئولینو سره وکتل.
د آزموینو ملي ادارې پلاوي د همدې ولایتونو له پوهنې مشرتابه سره په لیدنو کې، د کانکور آزموینې د داوطلبانو د بایومټریک ثبت پروسې، د کانکو آزموینې د اخیستلو څرنګوالي او تطبیق برخه کې تفصیلي خبرې وکړې.
د آزموینو ملي ادارې مالي او اداري رئیس د راتلونکي کانکور آزموينې لپاره د پوره چمتووالي او د لازمو آسانتياوو د برابرولو خبر ورکړ او د اړوندو ادارو ترمنځ يې پر لازمې همغږۍ ټينګار وکړ.
په یادو ناستو کې د هرات او نورستان ولایتونو پوهنې مسئولینو، د آزموینو ملي ادارې مالي او اداري رئیس ته د زده کوونکو لپاره د لازمو آسانتیاوو د برابرولو په برخه کې د خپلو اړوندو پوهنې ریاستونو د لازمو تیاریو ډاډ ورکړ او زیاته یې کړه، چې د روان ښوونیز کال د کانکور آزموينه به په پوره برياليتوب سره تر سره شي.
