د پوهنې وزارت سرپرست وزیر د کابل ښار مېشتو میرمنو له علمي او فرهنګي شخصیتونو سره ملاقات وکړ
د پوهنې وزارت د کنفرانسوانو په تالار کې دیاد وزارت سرپرست وزیر شیخ القرآن والحدیث الحاج مولوي نورالله«منیر» صاحب دکابل ښار مېشتو میرمنو له علمي او فرهنګي شخصیتونو سره چې شمیر یې تقریبا( ۵۰) تنو ته رسیده ، ملاقات وکړ.
دغه ملاقات چې د محترمې خور حافظ زینب موحد له لوري د قرآن عظیم الشان د څو مبارکو ایاتونو په تلاوت سره پیل شو، لومړی استاد مریم موحد، استاد سُمیه زاهد،استاد سینا رحیمي ،سمینه عبدالله او ځینو نور خویندو ویناوې وکړې او د هیواد د تعلیمي نظام د لا پیاوړتیا لپاره یې له محترم وزیر صاحب سره خپلې مشورې، وړاندیزونه او غوښتنې شریکې کړې.
وروسته محترم وزیر صاحب د خپلې وینا په ترڅ کې راغلیو میلمنو خویندو ته ښه راغلاست ووایه، د هغوی له مشورو او وړاندیزونو څخه یې مننه وکړه ، د یوې سالمې اسلامي ټولنې د جوړولو په برخه کې یې د میرمنو د رول او همدارنګه د میرمنو د زده کړې او کار د ضرورت په اړه مفصلې خبرې وکړې.
د غونډې په پای کې یادو میرمنو خپلې غوښتنې، مشورې، وړاندیزونه او عریضې په لیکلې بڼه له محترم وزیر صاحب سره شریکې کړې. غونډه د محترم وزیر صاحب له لوري د دعائیې په لوستلو سره پای ته ورسیده.
