دپوهنې وزارت سرپرست وزیر د هیواد له علمي او اکاډمیک شخصیت ښاغلي محمدصدیق پتمن سره وکتل
د شنبې په ورځ (۱۸/۷/۱۴۳۴هـ ق-۳۰/۱۱/۱۴۰۰هـ ش ) دپوهنې وزارت سرپرست وزیر شیخ القرآن والحدیث الحاج مولوي نورالله منیر صاحب ،تر غرمې وروسته د یاد وزارت د مقام په دفتر کې د هیواد له علمي او اکاډمیک شخصیت ښاغلي محمدصدیق پتمن صاحب سره وکتل .
د مجلس په پیل کې محترم وزیر صاحب ښاغلي پتمن صاحب ته ښه راغلاست ووایه او څرګنده یې کړه چې اسلامي امارت په تیره بیا د پوهنې وزارت د هیواد د علمي او اکاډمیکو کدرونو سالمو مشورو او وړاندیزونو ته تل د قدر په سترګه ګوري او تل د هغوی په نېکو مشورو عمل کوي.
ښاغلي پتمن صاحب د خپلو خبرو په ترڅ کې له محترم وزیر صاحب سره خپلې ارزښتناکې مشورې شریکې کړې او د هیواد د تعلیمي نظام د پیاوړتیا لپاره یې د هرډول همکاري ډاډ ورکړ .
قدرمن پتمن صاحب ژمنه وکړه چې په راتلونکي مجلس کې به نوموړی خپلې طرحې په لیکلې بڼه له محترم وزیر صاحب سره شریکوي.
د یادونې وړ ده، چې ښاغلي پتمن صاحب د روسيي اشغال په وړاندې د جهاد په فکري او فرهنګي سنګرونو کې یو فعال مبارز پاتې شویدی، د هیواد په تعلیمي ډګر کې یې زیات خدمتونه کړي دي او په دې برخه کې کافي مطالعه، تجربه او مهارت لري.
