دجاپان هېواد د ديپلوماتانو يو پلاوي د کابل ښار له يوې ليسې څخه ليدنه وکړه
په کابل کې د جاپان سفارت لومړۍ او دویمې سکرترې مېرمن کاناکو تاناکا او مېرمن ریکا اوماګاري په داسې حال کې چې د کابل ښار پوهنې رئیس قاري عبدالباسط حقاني یې هم ملتیا کوله، د نهمې ښوونیزې ناحیې اړوند الفتح لېسې څخه لیدنه وکړه.
په هغه کتنه کې چې د پلاوي له خوا د پوهنې رياست له مشرتابه او د يادې لېسې له مسئولينو سره ترسره شوه، د کابل ښار پوهنې رئيس ياد پلاوي ته د ښه راغلاست ويلو ترڅنګ، د افغانستان د بیارغونې په برخه کې د جاپان له مرستو او په ځانګړې توګه د پوهنې په برخه کې مننه وکړه او له ورغلي پلاوي څخه يې وغوښتل چې د ښوونځیو د نویو ودانیو رغونې په برخه کې دې له دغه وزارت سره لازیاتې مرستې وکړي.
ورپسې جاپاني پلاوي په بېلابېلو برخو په ځانګړي ډول د کرنې، روغتیا او پوهنې په برخو کې د خپل هېواد مرستو ته په اشارې سره ژمنه وکړه، چې د پوهنې د سکتور د ستونزو د هواري په موخه به د خپل هېواد له مشرتابه سره خبرې وکړي او په دې برخه کې به ځانګړې بودیجه اختصاص کړي.
