بدخشان ولایت کې د یو شمېر ښوونځیو لابراتوارونه په اړینو ښونیزو توکو سمبال شول
د بدخشان ولایت پوهنې ریاست مسئولین وايي چې د روان ښوونیز کال په درشل کې، د پوهنې وزارت د ټکنالوژۍ او ساینس مرکز ریاست په همکارۍ، د فیض آباد ښار سربېره په یو شمېر ولسوالیو کې د ښوونځیو ۱۱۵ بابه ښوونیز لابراتوارونه په اړینو درسي موادو سمبال شوي دي.
پورته ذکر شوي لابراتوارونه د ریاضي، کیمیا، بیولوژي او فزیک مضمونونو لپاره په معیاري تجهیزاتو، خوندي توکو، مصرفي موادو او اړینو تعلیمي وسایلو سمبال شوي دي.
همدارنګه په پلان کې ده چې د نوي ۱۴۰۵ ښوونیز کال له پیل سره سم به د همدغه ولایت یو شمېر نور ښوونځي هم په دې پروګرام کې شامل شي او د هغوی لابراتوارونه به له پلان سره سم سمبال شي.
