د پوهنې وزارت مالي او اداري محترم معین هرات ولایت ته رسمي سفر وکړ
د پوهنې وزارت مالي او اداري معین محترم الحاج مولوي صبغتالله وصیل، چې د دیني مدارسو د ازموینو پروسې د څارنې او ښوونیز او روزنیز وضعیت ارزونې لپاره هرات ولایت ته تللی، هلته یې د پوهنې رئیس محترم مولوي رحمت الله جابر سره په ګډه، له والي محترم شیخ نوراحمد اسلامجار سره وکتل.
په یاده غونډه کې، د پوهنې وزارت محترم معین وویل چې هرات ولایت ته یې د خپل سفر موخه، د مدارسو د ثانويه او مافوق ثانویه مرحلو مشترکو ازموینو ترسره کولو له پروسې څخه لیدنه، څارنه او د تعلیمي وضعیت بیاکتنه ده.
نوموړي د پوهنې ملاتړ او پراختیا په برخه کې د هرات ولایتي مسئولینو له دوامداره ملاتړ څخه مننه څرګنده کړه.
ورپسې د پوهنې وزارت مالي او اداري محترم معین د پوهنې مسئولینو په ملتیا، د دیني مدارسو مشترکو ازموینو له پروسې څخه لیدنه وکړه او له منسوبینو یې وغوښتل چې د ازموینې اصول او ترتیب مراعات او بشپړ عدالت تامین کړي.
