د اسلامي زدهکړو معینیت لخوا د دیني مدارسو د ثانویه او مافوق ثانویه درجو مشترکو ازموینو په اړه علمي سیمینار جوړ شو
د پوهنې وزارت د اسلامي زده کړو معینیت لخوا د دیني مدارسو د ثانویه او مافوق ثانویه درجو مشترکو ازموینو په اړه علمي سیمینار، د اسلامي زدهکړو محترم معین او د نورو مرکزي ریاستونو یو شمېر رئیسانو په ګډون سره ترسره شو.
په پیل کې د پوهنې وزارت د اسلامي زده کړو معین محترم الحاج مولوي کرامت الله آخندزاده په خپله وینا کې د ازموینې مسئولینو او اداري مدیرانو ته ځینې اړینې سپارښتنې وکړې، ویې ویل: (یاده ازموینه د طلابو لپاره خورا مهمه ده او زموږ د هڅو پایلې له دغو ازموینو څخه ترلاسه کېږي؛ له همدې امله، اړینه ده چې ازموینې په بشپړې روڼتیا سره پلي شي).
نوموړي زیاته کړه؛ د الله تعالی د رضا لپاره خپلې ارادې پاکې کړئ، د مادي شیانو پروا مه کوئ او دغه ازموینه او د هغو پوښتنې د امانت په توګه وګڼئ."
محترم معین څرګنده کړه، د روڼتیا ډاډمنولو لپاره پوهنې وزارت د هر زون لپاره د څارنې ټیمونه ټاکلي دي، تر څو د ازموینې پروسه په هراړخیزه توګه وڅاري.
ورپسې د مدارسو او دارالحفاظونو محترم رئیس مسئولو چارواکو ته د ازموینې د کړنلارې او محتوا په اړه مفصل معلومات وړاندې کړل او ډاډ یې ورکړ چې، ازموینې به د شرایطو وړ کړنلارې او پلان سره سمې پلې شي.
