د پوهنې وزارت د ښوونې او روزنې محترم معین د کابل ښار اړوندو ښوونځیو له تعلیمي وضعیت څخه ارزونه وکړه
د پوهنې وزارت د ښوونې او روزنې معین محترم شیخ عبدالمالک حقاني، د وزارت د یو شمېر مسئولینو په ملتیا، د کابل ښار رڼا او بي بي مهرو ښوونځيو ته لاړ او د هغوی ښوونیز بهیر یې له نږدې وڅېړه.
نوموړي په یاده لیدنه کې، د پورته ذکر شویو مرکزونو تعلیمي او تدریسي وضعیت وارزاوه او د پوهنیز کیفیت لا ښهوالي لپاره یې مسئولینو ته لازمې سپارښتنې وکړې.
د ښوونې او روزنې محترم معین د خپلو خبرو پر مهال وویل: (د ښوونکو اساسي دنده دا ده، چې د زدهکوونکو د استعدادونو راویښولو او پیاوړتیا لپاره هڅې وکړي، تر څو هغوی د اسلامي، ملي او ټولنیزو ارزښتونو پر بنسټ وروزل شي.)
نوموړي له زدهکوونکو هم وغوښتل، چې د علم د زدهکړې له فرصتونو څخه اعظمي ګټه واخلي، خپلې ورځنۍ زدهکړې په مینه او پوره ژمنتیا سره تعقیب کړي.
په پای کې د رڼا او بي بي مهرو لېسو مسئولینو د پوهنې وزارت محترم معین له پاملرنې مننه وکړه او د خپلو ښوونیزو اړتیاوو پوره کېدو په برخه کې یې د لا زیاتو اسانتیاوو غوښتنه وکړه.
