د پوهنې وزارت د دعوت او ارشاد ریاست مسئولینو له اداري او مالي معینیت څخه لیدنه وکړه
د پوهنې وزارت د دعوت او ارشاد ریاست یو پلاوي، د یاد وزارت د مالي او اداري معینیت له مسئولینو سره د دیني ارزښتونو د ترویج او د اداري اخلاقو د لاپیاوړتیا په موخه ځانګړې ناسته وکړه.
په دغه لیدنه کې دواړو لوریو د اسلامي لارښوونو د تطبیق، د کارکوونکو او منسوبینو د معنوي روزنې او د ښوونیزو چاپېریالونو د بشپړې اصلاح په اړه مفصلې خبرې وکړې.
همدارنګه د دعوت او ارشاد ریاست مسئولینو وویل، چې د ښوونې او روزنې بنسټیزه موخه، یوازې علمي پرمختګ نه دی، بلکې د اخلاقو، تقوا او خدمت روحیې روزنه هم له دې بهیر سره ژوره اړیکه لري. هغوی ټینګار وکړ، چې د وزارت ټول کارکوونکي دې د حضرت محمد مصطفی ﷺ د سیرت او سنتو په رڼا کې خپل مسلکي مسئولیتونه ترسره کړئ.
د مالي او اداري معینیت مسئولینو د یاد ریاست له سپارښتنو څخه د قدرداني ترڅنګ ژمنه وکړه، چې د وزارت د مشرتابه د تګلارې او د دیني لارښوونو سره سم به خپلې ورسپارل شوې دندې پرمخ وړي. هغوی وویل، چې د معنوي روزنې او دیني درسونو په پروګرامونو کې به په جدي ډول ګډون کوي، تر څو د وزارت کاري فضا لا د اخلاص او صداقت په روحیه بډایه شي.
